BREKING : MAMA, BINTI YAKE WAUAWA KINYAMA, WATUMBUKIZWA CHOONI

BREKING : MAMA, BINTI YAKE WAUAWA KINYAMA, WATUMBUKIZWA CHOONI

WAKATI tukio la Mwandishi na Mhariri wa Gazeti la Kingereza la The Guardian, Finnigan Simbeye kuokotwa akiwa hajitambui huko Bunju jijini Dar likiibua mambo mazito, mama mwenye umri wa miaka 70, Lightness Mavura na bintiye Judica Msuya (37) pichani, wanadaiwa kuuawa kinyama, Uwazi lina kisa na mkasa wa kutisha.
Simbeye aliokotwa juzi, Ju­mapili asubuhi akiwa hajitambui na majeraha yaliyoonesha ku­pigwa mno hivyo kuibua gumzo huku mama huyo na bintiye miili yao ikikutwa kwenye shimo la choo.

Bunti.

TUKIO LA MAMA NA BINTIYE

Kwa mujibu wa mashuhuda wetu, mama na bintiye huyo, wakazi wa Kijiji cha Msangeni, Wilaya ya Mwanga mkoani Kilimanjaro waliibua sintofa­hamu baada ya miili yao kukutwa kwenye shimo la choo ikiwa imeharibika na kutoa harufu kali iliyokuwa imesambaa.

Mashuhuda hao walilieleza Uwazi kuwa, miili hiyo iligundu­lika hivi karibuni baada ya ndugu kutowaona wawili hao kwa muda mrefu huku nyumba yao ikibaki mlango wazi.

MTOTO WA MAREHEMU ANENA

Mmoja wa watoto wa marehemu, Daimael Msuya aishiye jijini Arusha alilieleza Uwazi kwamba, alifika nyumbani kwa mama yake huyo, Machi 22, mwaka huu kwa lengo la kumjulia hali baada ya kutopatikana kwenye simu yake ya mkononi kila alipompi­gia hivyo akaona aende kujua kulikoni kwani haikuwa kawaida yake kutopokea simu.

“Nilipofika nyumbani kwa mama yangu, nilishangaa kukuta mlango ukiwa wazi na mazingira ya ndani yalikuwa machafu mno, kinyume na nilivyozoea kuikuta nyumba ikiwa safi,” alisema Daimael.

MBUZI WADHOOFU

Alisema kuwa, katika kuzunguka kutazama mazingira ya nyum­bani hapo alipigwa na butwaa kukuta mbuzi wanaofugwa na mama na bintiye huyo wakiwa bado wamefungiwa ndani huku hali zao zikiwa zimedhoofu.

Alieleza kuwa, jambo hilo lilim­tia shaka na kumlazimu kuomba msaada kwa majirani na ndugu zake wengine ili wafike nyumbani kwa mama yake akitaka kujua kilichokuwa kikiendelea nyum­bani hapo na kwamba hakum­kuta mama na dada yake hivyo alitaka kujua walipo.

Daimael alisema kuwa, mara baada ya ndugu na jirani kufika, walianza kumtafuta marehemu na mwanaye, walipozunguka ny­uma ya nyumba, walisikia harufu isiyo ya kawaida na walipofuatilia waligundua kuwa ilikuwa ikitokea kwenye shimo la choo lililopo nyumbani hapo.

TOCHI ILIVYOTUMIKA

Alisema kuwa, baadaye waliamua kumulika na tochi ndani ya shimo hilo ndipo walipoiona miili ya marehemu hao ikiwa imeharibika vibaya na kuwa ndiyo iliyokuwa ikitoa harufu kali nyumbani hapo.

Daimael alieleza kuwa, baada ya kubaini miili hiyo walitoa taari­fa polisi ambao walifika na kuitoa miili hiyo kisha kuifunga kwenye mifuko ya nailoni kutokana na kuharibika na kutoa harufu kali kisha kwenda kuihifadhi kwa ajili na uchunguzi na taratibu za mazishi.

NDUGU WAKAMATWA

Kufuatia tukio hilo, Jeshi la Polisi mkoani Kilimanjaro linawashikilia watu watatu ambao ni ndugu wa marehemu hao wanaoshukiwa kuhusika na tukio hilo.

KAMANDA WA POLISI

Kamanda wa Polisi wa Mkoa wa Kilimanjaro, SACP Hamisi Issah aliwataja watuhumiwa hao kuwa ni mkwe wa marehemu aitwaye Samweli au Mtumishi, Paulo Robert na Sadiki Robert ambao ni watoto wa kaka yake mama marehemu.

Hata hivyo, taarifa zaidi zil­idai kwamba, kabla ya tukio hilo watuhumiwa hao walikuwa na mgogoro wa kifamilia na mare­hemu Lightness hivyo ndugu wa familia hiyo waliomba uchunguzi ufanyike na haki ipatikane kwani ni tukio la kinyama zaidi kutokea kijijini hapo.

TURUDI TUKIO LA MWANDISHI

Tukirudi kwenye tukio la Mwandi­shi na Mhariri wa Gazeti la The Guardian, Finnigan Simbeye, jamaa huyo aliokotwa juzi Jumapili asubuhi huko Bunju nje kidogo ya Jiji la Dar akiwa hajita­mbui na majeraha yaliyoonesha kupigwa mno.

Taarifa kutoka kwa mashuhuda zilieleza kuwa, Simbeye alioko­twa akiwa katika hali mbaya huku akiwa na majeraha ya kipigo, jambo lililozua mjadala mzito huku wengine wakidai huenda alitekwa na wasiojulikana kisha kumtesa na kwenda kumtupa maeneo hayo.

Wengine walikwenda mbali zai­di na kuhusisha mfuko wa kiroba cha sandarusi kilichokuwa eneo la tukio kuwa huenda ndicho kilitakiwa kutumika kumfunga na kwenda kumtupa baharini.

Kwa mujibu wa mkewe, Rosemary Mirondo, mumewe huyo aliondoka nyumbani siku ya Jumamosi asubuhi na hakure­jea hadi alipopigiwa simu kuwa ameokotwa akiwa hajitambui na kwamba polisi waliokuwa doria kwenye eneo hilo ndiyo waliompeleka katika Hospitali ya Mwananyamala, Dar kwa ajili ya matibabu.

KAMANDA MULIRO

Akizungumza na Uwazi juu ya tukio hilo, Kamanda wa Polisi wa Mkoa wa Kipolisi wa Kinondoni, ACP Jumanne Muliro alisema kuwa, uchunguzi ulibaini kuwa mtu huyo alikuwa amelewa hivyo kuwashangaa na kuwapuuza wanaolihusisha tukio hilo na mambo ya utekaji wa wasioju­likana.

Alisema kuwa, jeshi hilo linaen­delea na uchunguzi na kama itabainika kuwa alikuwa amelewa kupita kiasi na kulala barabarani litamchukulia hatua za kisheria kwani kufanya hivyo ni kosa kisheria.